Kaloj ditët me mallin e pashuar për vendlindjen

Intervistë me ish drejtorin dhe botuesin

e parë të gazetës “Malësia” Zotin Mark Lumaj

Zoti Mark Lumaj ka vite që është larguar nga vendlindja dhe jeton në Shtetet e Bashkuara të Amerikës. Ka fituar statusin e azilantit dhe jeton familjarisht në Bronx të shtetit të Njujorkut. Megjithë stabilitetin ekonomik Zoti Lumaj ndihet i përmalluar për vendin e tij, ndaj mendja dhe shpirti i fluturojnë në trevën e Malësisë Madhe, në fshatin Dedaj të komunës Shkrel. Zoti Lumaj nga vendlindja e tij ruan shumë kujtime e malle, por Gazeta “Malësia” që u botua për 45 numra me kontributin e jashtëzakonshëm të tij si botues e drejtor, që siç thoshte shkrimtari Ramiz Likaj e bëri me gojë treven tonë, është ndoshta nga nostalgjitë më të pashlyera, ndaj ne me rastin e Ridaljes së gazetës “Malësia” menduam t’i marrim këtë intervistë:

“Malësia” – Zoti Lumaj si e ndien veten aktualisht në Shtetet e Bashkuara të Amerikës?

Përgjigje (e z. Lumaj) Ndjehem si gjithë shqiptarët e tjerë nga treva e Malësisë e vise të tjera të Shqipërisë Etnike, që vetëm fizikisht janë këtu, ndërsa Zemrën dhe shpirtin i kanë atje në vendlindje.

Pyetje, Z. Lumaj Kolegu ynë Z. Vasel Gilaj me disa kolegë të tij që kanë bërë emër në media, kanë vendosur të fillojnë botimin e Gazetës “Malësia”, cili është mendimi juaj si ishte botues e drejtor i parë i saj?

Përgjigje (M. Lumaj), Në radhë të parë dua ta përshëndes këtë nisëm fisnike, pasi treva e Malësisë Madhe e meriton një dritare të tillë dije dhe kulture, për të publikuar aktualitetin e zhvillimeve kulturore e ekonomike, por edhe për të vënë në dukje vlerat e saj historike, që nderojnë jo vetëm malësorët, por të gjithë shqiptarët. Në urimin tim për gazetën dua të kujtoj edhe nderimin tim më të thellë për të gjithë ata burra e burrnesha që kontribuan për 45 numra të Gazetës “Malësia”, por në veçanti dua të kujtoj me respekt dy burra të shquar që nuk jetojnë më, të nderuarit Caf Jonuzi dhe Rrok Frangajn, ndërsa të tjerët që jetojnë do ta nderojnë vehten me ndihmesën që do të japin në numrat e ardhshëm të gazetës, ku ata gjejnë vehten. Gjithashtu dëshiroj që Gazeta “Malësia” t’i kontribuojë paqës, harmonisë e mirkuptimit të banorëve të Malësisë e më gjërë.

Pyetje, Zoti Mark cili do të ishte mesazhi i juaj për lexuesit e Gazetës “Malësia”?

Përgjigje (M. Lumaj): I përshëndes sinqerisht të gjithë kudo që ndodhen, dhe ju dëshiroj me shpirt; fat, gëzim dhe lumturi pranë familjeve të tyre dhe në vendin e tyre. Unë dhe të gjithë malësorët që kemi emigruar për arsye të ndryshme këtu në Amerikën simbol të lirisë e Demokracisë e kemi të pashuar kurrë mallin për vendlindjen tonë, për atdheun dhe për gjithçka kemi lënë atje, ku ta themi hapur, atje kemi edhe një pjesë të madhe të zemrës, mendjes e shpirtit tonë. Ndaj ribotimi i gazetës “Malësia” dhe ardhja e saj (me internet apo fizikisht) në Amerikë, shpresojmë se do të sjellë një pjesë të jetës së Malësisë e Shqipërisë, me të cilën do të çmallemi ne emigrantët e përmalluar. Duke e konsideruar sukses të Malësisë ribotimin e gazetës, ne emigrantët me këtë rast së bashku me urimet e zemrës do t’u ofrojmë mbështetjen tonë morale, dhe pse jo edhe atë materiale, pasi kjo detyrë është sa fisnike aq madhështore për të gjithë ata që do të kontribuojnë në vijimsin e ridaljes së gazetës “Malësia”.... Suksese e fate...

Intervistoi

Rifat Ymeri