"Lufta e Koplikut" e harruar

nga shteti dhe pushteti

Nga Ndue bacaj

Lufta e Koplikut siç dihet është e para luftë mbrojtëse e organizuar nga shteti dhe një qeveri shqiptare mbarë-kombëtare pas 441 vitesh lufte e qëndrese ndaj pushtuesve shekullorë, dhe atyre fqinjë e tjerë kohore. Një një vend normal Europian kjo luftë mbrojtëse duhet të ishte ndër më të nderuarat e përkujtuara, por në Shqipëri fatkeqësisht kjo ka ndodhur rrallëherë, dhe në vend të kësaj lufte janë përkujtuar e hymnizuar luftra ideologjike me prapavijë komuniste, ku për nga përmasat e luftës e dëshmorëve janë qindra herë më të vogla, simbol i këtij hymnizimi të dhunshëm nga koha e qoftëlargut Enver ka mbetur përkujtimi i luftës një ditore të Reçit, që në fakt duhet të përkujtohet, por jo të hymnizohet aq shumë sa të hijezojnë luftra të tjera mbrojtëse e çlirimtare disa herë më të mëdhaja e me rëndësi për fatet e shqiptarisë. Mjerisht kjo Luftë një ditore kundër fashiste italian edhe sot në demokraci financohet e iniciohet nga pushteti lokal në mënyrë të përvitshme, ku kjo luftë nga shumë të rinj jo vetëm nuk njihet, por dita e përkujtimit mendohet si festë e fshatit Reç, e jo ditë përkujtimi të një lufte mbrojtëse.

Fatësisht në vitet e demokracisë, atë që nuk e bëri shteti filloi ta bëjnë pushteti lokal i Koplikut, ku në vitin 2005 për herë të parë organizohet përkujtimi i luftës mbrojtëse kundër pushtuesve Serbo – Malazezë, luftë e cila zgjati plot 203 ditë (27 korrik 1920 – 14 shkurt 1921). Këto ditë lufte e përpjekjesh të Malsorëve, Shkodranëve e gjithë shqiptarëve të Veriut, ishin të organizuara nga Qeveria shqiptare e dalë nga Kongresi i Lushnjës i janarit të vitit 1920, si dhe ishte mbarëkombëtare, pasi edhe jugu i Shqipërisë luftonte me lakmitë shovene Greke, dhe veçanërisht Vlora me rrethinat kërkonte të çlirohej nga pushtuesit italianë. Lufta e Vlorës ka patur një fat më të mirë pasi ndonse nuk është e përmasave të Luftës së Koplikut, është përkujtuar e nderuar shtetrisht e vazhdimisht si luftë kundër pushtuesve italianë, ndërsa Lufta e Koplikut kundër pushtuesve sllavë është lënë në “harresë”.

Gjithsesi “Lufta e Koplikut” është një luftë mbrojtëse jo vetëm kundër lakmive Serbo – Malazeze, por edhe kundër vendimeve antishqiptare të Europës Plakë, gjë që solli edhe dhjetra dëshmorë të lirisë dhe qindra të plagosur pa llogaritur dëmin ekonomik e shoqëror e tjerë. Lufta e Koplikut shënon dhjetra beteja heroike nëpër trojet e Malësisë Madhe, por simboli i pashuar i kësaj lufte ka mbetur beteja e 20 shtatorit e zhvilluar në një shtëpi të thjeshtë të lagjes Llazan të Koplikut, ku trimi dëshmor Zef Prel Martini përsëriti betejën famëmadhe të Vraninës të shekullit 19-të. Dhe është pikërisht kjo datë historike e vlerësuar nga pushteti Lokal i Koplikut, i cili vendosi përkujtimin e luftës së Koplikut pikërisht që nga 20 shtatori 2005, gjë që u përsërit me madhështi edhe në vitin 2006. Është për t’u theksuar se në vitin 2007, opinioni priste një përkujtim më madhështor të “Luftës së Koplikut” pasi duhej të ishte hera e tretë dhe vërtet, por kjo luftë deri tani jo vetëm nuk është përkujtuar, por duket se do të harrohet nga Pushteti Lokal i Bashkisë të Koplikut, i cili ka pasë marrur përsipër organizimin dhe mbarëvajtjen e përkujtimit të luftës së parë mbrojtëse të organizuar nga shteti shqiptar pas rreth 441 vitesh luftrash e përpjekjesh, shpesh në kushtet e mbijetesës. Ne ende nuk e besojmë harresën që rrezikon të rikthehet, por zhvillimet e deritanishme na e imponojnë këtë, pasi siç mësojmë nga nënkryetari i Këshillit Bashkisë Z. Vasel Gilaj, Këshilli i Bashkisë ka pasë planifikuar rreth 3 milion lekë të vjetra për të organizuar përkujtimin e Luftës së Koplikut. Gjithsesi vlen të theksohet se opinioni për ditë pyet kur do të përkujtohet këtë vit “Lufta e Koplikut”, apo mos vallë do t’i rikthehet harresa (jo e dikurshme për hater të Sllavëve që na krijuan Partinë), por sot për hatër të Fqinjësisë së “RE” me Malazezët... apo diçka tjetër. Ne po e mbyllim këtë shënim të shkurtër duke shpresuar se kjo është vetëm një vonesë e jo Harresë...