po vjen malesia

Flet botuesi i gazetës "Malësia",

z. Vasel Gilaj

Pyetje: z. Vasel, pse vendosët që të ribotoni gazetën “Malësia”?

Përgjigje: Për ta bërë Malësinë sërish me gojë, vendim që erdhi pas disa konsultimesh dhe bisedash me bashkëpunëtorët e mi si dhe nga e drejta që unë kam për të botuar gazetën “Malësia”

Pyetje: Nga e keni këtë të drejtë?

Përgjigje: Nga z. Mark Lumaj që më ka lënë pronësinë e gazetës si dhe nga vendimi i gjykatës konform ligjeve dhe rregullave të shtetit.

Pyetje: Kur ka filluar botimi i gazetës “Malësia”?

Përgjigje: Gazeta “Malësia” si media e parë në historinë e M. Madhe ka nisur të botohet më 23 Dhjetor të vitit 1995 dhe është botuar deri në vitin 2001, përveç vitit të luftës 1996, kohë kur gazeta qe ndaluar me vendim qeverie.

Pyetje: Sa numra kanë dalë deri tani?

Përgjigje: Deri tani janë botuar 45 numra gazete ose 330 faqe dhe vetëm për Malësinë e Madhe, vërtet një ndër librat dhe dokumentat më të çmuar, pasi ato ndodhen të arkivuara edhe në Bibliotekën Kombëtare në Tiranë.

Pyetje: Çfarë të rejash do të na sjellë kjo gazetë?

Përgjigje: Gazeta do të sjellë shumë të reja, siç janë: mundësia e leximit në Internet në të gjithë botën, dërgimi i saj në SH.B.A. një herë në muaj një faqe do të jetë në anglisht, faqja e diasporës që do të përgatitet nga një staf malësorësh intelektualë që jetojnë e punojnë në SH.B.A. që janë: Gjekë Marinaj, Rush Dragu, Zef Lleshi, Gjovalin Lumaj, Pjetër Jaku, Marjana Naçi, Mark Lumaj e të tjerë. Gjithashtu kemi siguruar edhe bashkëpunimin e shqiptarëve në Mal të Zi. Ndërkohë që nuk do të mungojë as aktualiteti nga Malësia si: politika, ekonomia, historia, tradita, kultura, intervista, humori, sporti etj. gjithçka do të jetë vetëm malësore dhe malësorçe.

Pyetje: Kush do ta drejtojë gazetën?

Përgjigje: Botues do të jem unë, kryeredaktor Rifat Ymeri dhe redaktor Ndue Bacaj.

Pyetje: Z. Gilaj, keni bërë aq para sa të botoni një gazetë?

Përgjigje: Këtu më keni zënë vërtet keq, pasi unë nuk di të bëj lekë, sepse nuk jam servil i pushteteve të askujt. Më pëlqen të bëj opozitë dhe këtë e kam vërtetuar. Vite më parë të majtët vërtetë kanë menduar se sa i madh do të bëhesha kur të vijë PD në pushte. Por ja që sërish bëj vetëm punën e gazetarit.

Pyetje: Ku do t’i gjeni paratë për të botuar gazetën?

Përgjigje: Prapë ju me paratë?! Një pjesë të konsideruehsme nga shitja e gazetës, besoj se një gazetë jo-servile do të ketë treg, si dhe tek disa miq të mi, të cilët kanë shprehur gatishmërinë për të na ndihmuar në nismën tonë. Unë nuk jam i vetëm, gazeta mban emrin “Malësia” dhe nuk është pronë e imja, por e të gjithë malësorëve.

Kemi dëgjuar se ju kanë kërkuar për ta shitur gazetën?

Përgjigje: Po, është e vërtetë. Personat janë pushtetarë, por nuk kam pranuar për ta shitur. “Malësia” ka nevojë dhe i ka të gjitha resurset për ta mbajtur një gazetë të Pavarur. Malësia jonë e meriton.

Pyetje: Nxjerrja e gazetës, do të thotë që ju do ta lini televizionin?

Përgjigje: Punën në televizion e kam filluar 5 vite pasi kam punuar si mësues, në gazetën “Malësia” si korrespondent i gazetës RD dhe pas botimit të librit “Kur qesh malësori”. Televizionin nuk do ta lë, por nuk do ta kem primar, pasi me këtë nivel dhe me këta pronarë mediasjh që kanë shkruar vetëm letra kur kanë qenë ushtarë, zor se mund të ketë media që e kryejnë atë mision. Shyqyr, që janë të vdekurit dhe mesazhet e dashurisë, se do të mbylleshin në kohë rekord.

Pyetje: Disa nga pronarët e mediave lokale, ku ju keni punuar, ju kanë etiketuar si gazetar “endacak”?

E di, por të gjithë më kanë kërkuar sërish, pasi asnjëherë nuk më kanë larguar, por jamë larguar vetë, për shkak të parimeve dhe të qëndrimeve të mia parimore dhe asnjëherë të korruptuara. Nuk kam pranuar që të shitem e as të blihem si dhe as të bëhem vegël dhe këtë qëndrim do vazhdoj ta mbaj edhe në gazetën “Malësia”.

Tani mjaft, të kemi pak durim qëp vlerësimet të na i bëjë lexuesi, brenda dhe jashtë vendit.

Malësia po vjen...

Intervistoi

Arsyela Delishaj